Radio online
Գլխավոր էջ / Ծրագրեր / Լուրեր / Հայկական ֆուտբոլի առանցքը. Խորեն Հովհաննիսյան

Հայկական ֆուտբոլի առանցքը. Խորեն Հովհաննիսյան

Գոլը խփեց Խորեն Հովհաննիսյանը… Гол забил Хорен Оганесян… Siked the goal Khoren Hovhannisian…

Ահա այսպես են հաղորդել աշխարհի տասնյակ մարզադաշտերի լուսատախտակներն ու հաղորդավարները՝ ուրախություն պատճառելով միլիոնավոր ֆուտբոլասերների:
«Նոր ֆուտբոլն» անդրադառնում է Խորեն Հովհաննիսյան ֆուտբոլիստին:

Խորեն Հովհաննիսյանը ծնվել է 1955թ. հունվարի 10-ին: Նրա խաղը հիացմունքի էր արժանանում անգամ հակառակորդի երկրպագուների կողմից: Նրա անզուգական խաղով հիանում էին ոչ միայն Հայաստանում, այլ նաև նրա սահմաններից դուրս: ԽՍՀՄ առաջնության բարձրագույն խմբում հանդես է եկել Երևանի «Արարատի» (1975-85թթ.) և Տաշքենդի «Պախտակորի» (1991թ.) թիմերում:
Օլիմպիական խաղերի բրոնզե մեդալակիր (1980թ.), Եվրոպայի երիտասարդական առաջնության հաղթող (1976թ.), ԽՍՀՄ 1976թ. գարնանային առաջնության արծաթե մեդալակիր։ 1979-84թթ. հանդես է եկել ԽՍՀՄ հավաքականում։ Հայ ֆուտբոլիստներից առաջինն է, որ մասնակցել է աշխարհի առաջնության եզրափակիչ փուլի (1982թ.) և խփել 1 գոլ։ Հանդես է եկել նաև ԽՍՀՄ պատանեկան հավաքականում։
Ավարտելով մրցելույթները՝ մարզչական աշխատանքի է անցել Հայաստանում՝ ղեկավարելով Երևանի Հայ մարմնակրթական ընդհանուր միության (ՀՄԸՄ) և «Փյունիկ» թիմերը, մարզել է Բեյրութի ՀՄԸՄ-ն, 1996-97թթ.-ին գլխավորել է Հայաստանի ազգային հավաքականը։
2004 թվականին ՈՒԵՖԱ-ի ստեղծման 50-րդ տարեդարձի առթիվ կազմակերպված քվեարկության արդունքում ճանաչվել է Հայաստանի (1954-2003թթ.) լավագույն ֆուտբոլիստ։
2010թ. մայիսի 24-ին ՀՀ Նախագահի հրամանագրով պարգևատրվել է «Մովսես Խորենացի» մեդալով:


Խորեն Հովհաննիսյանի մասին ասել են.

Նիկիտա Սիմոնյանը 1984թ.-ին ասել է (սպորտի վաստակավոր վարպետ, «Արարատի» ավագ մարզիչ).
«Ընդհանրապես Հովհաննիսյանն իր բոլոր հնարավորությունները դեռ ցույց չի տվել: Եթե կարճ բնութագրեմ, ապա հիանալի տիրապետում է գնդակին, որոշումները ոչ ստանդարտ և յուրօրինակ են, ընկերներին իր ետևից տանելու շնորհքով է օժտված: Թեև նրա վրա միշտ հսկողություն են սահմանում՝ կարողանում է գոլեր խփել և ղեկավարել թիմի խաղը»:

Վլադիմիր Սալկով (ԽՍՀՄ օլիմպիական մարզիչ).
«Հովհաննիսյանը միջազգային մակարդակի ֆուտբոլիստ է: Նա առաջատար է, առաջատար՝ ի շահ թիմի»:

Լև Լեբեդև («Պրավդա» թերթի մարզական մեկնաբան).
«Հովհաննիսյանը տեխնիկապես լավ պատրաստված է, բռնկուն, նրանից միշտ կարելի է վտանգ սպասել: Հովհաննիսյանն իր էությամբ մարտիկ է»:

Վիճակագրություն
Ստորև ներկայացված է Խորեն Հովհաննիսյանի խփած գոլերի լրիվ հաշվարկը.
1.Երկրի առաջնության խաղեր- 82 գնդակ
2. ՍՍՀՄ գավաթ- 13 գնդակ
3. ՍՍՀՄ հավաքական (ազգային հավաքականների հետ հանդիպումներում)- 8 գնդակ
4. ՍՍՀՄ հավաքական (ակումբների հետ)- 10 գնդակ
5. ՍՍՀՄ երիտասարդական հավաքական.
5.1 Եվրոպայի առաջնություն- 3 գնդակ
5.2 Ակումբների հետ խաղերում- 5 գնդակ
6. Եվրոպական գավաթներ- 2 գնդակ
7. «Արարատի» միջազգային խաղերում- 10 գնդակ
8. «Արարատի» ընկերական խաղերում- 19 գնդակ
9. Փոխարինողների կազմում- 10 գնդակ
Ընդամենը՝ 162 գնդակ:

«Նոր Ֆուտբոլ»
www.onlineradio.am

Հեղինակը՝ Նորայր Մարտիրոսյան

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով

seventeen + 3 =