Հետևելով մեր հաղորդումներին՝ հնարավորություն ես ստանում առաջիններից մեկը ճանաչելու երիտասարդ գրողներին, նրանց ստեղծագործական թոթովանքներին, հոգեցունց ապրումներին, մեծ ճանապարհի շեմին կատարած առաջին քայլերին:
Այսօրվա մեր հյուրը գրում է ոչ միայն չափածո և արձակ ստեղծագործություններ, այլ նաև՝ ցիտատներ և հոդվածներ: Ահա մի փոքրիկ ծաղկաքաղ նրա հեղինակային ցիտատներից.
1. Համակերպվել պարտության հետ նույնն է, ինչ պատրաստվել գալիք պարտություններին…
2. Պտղատու ծառը միշտ էլ գեղեցիկ է:
3. Գործողությունների ճիշտ ընտված հերթականությունը նպատակին հասնելու արվեստ է:
4 Ոչ բոլորն են ի զորու գնահատել իրենց վառարանի տված ջերմությունը…
Կարելի է շարունակել ցիտատների շարքը, սակայն առավել նախընտրելի է, որ այդ մասին խոսի հենց ինքը՝ հեղինակը: Մեր այսօրվա հյուրն է Լևոն Ստեփանյանը:
Բարև, Լևոն: Շնորհակալություն մեր հրավերն ընդունելու համար: Խնդրում եմ, պատմիր, թե ո՞ր տարիքում և ինչպե՞ս ծնվեցին քո առաջին ցիտատները:
Դեռ փոքր տարիքից ստեղծագործել եմ: Բայց լրջորեն ստեղծագործել սկսել եմ մոտ 1 տարի առաջ: Առաջին ցիտատները եղել են հենց ձեր կարդացածներից:
Եղե՞լ են դեպքեր, երբ գրես որևէ ստեղծագործություն, ապա մաս առ մաս կրճատելով արդյունքում ստացվի ցիտատ:
Եղել են, որովհետև երբեմն իմ գրածներն ինձ այնքան էլ դուր չեն գալիս, բայց գրածի միջից ինչ-որ տողեր ավելի հետաքրքիր են: Դրանք առանձանցնում եմ և որպես ցիտատ ներկայացնում հանրությանը:
Զրույցի սկզբում նշեցի, որ գրում ես նաև հոդվածներ: Ի՞նչ թեմաների ես անդրադառնում:
Հոդվածներս կրում են հասարակական, քաղաքական, ինչպես նաև՝ սոցիալական և տնտեսական բնույթ: Հոդվածներիցս մեկը կոչվում է «Վատ են ապրում այն ժողովուրդները, ովքեր չեն ցանկանում լավ ապրել»: Ընտրում եմ արդի թեմաներ, որոնք ավելի ակտուալ են:
Երբևէ չե՞ս մտածել լրագրողական գործունեությամբ զբաղվելու մասին:
Երբեք: Հոդվածները գրում եմ, որպեսզի դրանք լուսաբանվեն և գոնե ամեն հոդվածից հետո որոշ մարդիկ որոշ բաներ քաղեն և իրենց հետագա կյանքում դրանք կիրառեն:
Դու նաև «ՄայԲուքս» օնլայն գրախանութի հիմնադիր-ղեկավարն ես: Հետաքրքիր է, այժմ ո՞ր գրքերն ունեն առավել մեծ պահանջարկ:
Եթե դիտարկենք ժամանակակից հայ գրականությունը, հիմնականում ավելի արդիական է Վահագն Դիլբարյանի «100 բիզնես գաղտնիքները», Էդգար Հարությունյանի «Նվիրելու արվեստը կամ ձոն վարդին», Դավիթ Սամվելյանի «Արտագաղթած կարոտը»:
Ինչպե՞ս կգնահատես մերօրյա ընթերցանության մակարդակը:
Նույն իմ սպառողները, հաճախորդները 10-12 տարեկան երեխաններից սկսած մինչև 70 տարեկան մարդիկ են: Գրքերը հիմնականում ուսանողության շրջանում է լավ վաճառվում: Ի զարմանս բոլորիս, շատ ընթերցող է հայ ազգը, քանի-որ ես այդպես չէի կարծում մինչ այս գործունեությամբ զբավելը:
Ինքդ ի՞նչ գրքեր ես սիրում կարդալ:
Քանի որ սովորում եմ տնտեսագիտության ոլորտում, ավելի շատ բիզնես, տնտեսագիտություն, բայց հոգեբանականն էլ է ավելի ձգում: Ինչպես նաև՝ գեղարվեստական գրքեր:
Շնորհակալ եմ քեզ հետաքրքիր և բովանդակալից զրույցի համար: Մաղթում եմ, որ երբեք ընթերցողների կարիք չունենաս ոչ գրախանութում, ոչ էլ հեղինակային ստեղծագործություններդ ներկայացնելիս:
Ես ևս կցանկանամ հայտնել շնորհակալությունս և պատրաստակամությունս՝ հանրության ու երիտասարդ գրողների կողքին լինելու համար:
Ընթերցանությունն այսօր առավել քան հասանելի է, մնում է միայն ունենալ համապատասխան ցանկություն:
«Առաջին անգամ լավ գիրք կարդալիս մենք նույն զգացումն ենք ունենում, ինչ նոր ընկեր ձեռք բերելիս: Կրկին կարդալ արդեն կարդացած գիրքը` նշանակում է նորից տեսնել հին ընկերոջը»,- այսպես է ասում Վոլտերը: Ինձ մնում է միայն հավելել, որ յուրաքանչյուր նոր գրողի բացահայտում հույսն ու ապավենն է ժամանակակից գրականության նոր ու պայծառ լուսաբացի:
———————————————-
Հաղորդավար՝ ՍՈՆԵՏ (Սոնա Վանյան)
———————————————————————————————
«Օնլայն Ռադիոյի» անցուդարձին հետևելու համար անցիր հղումով և հավանիր էջը
———————————————————————————————
Հետևիր «Օնլայն Ռադիոյի» եթերին Ֆեյսբուքում
Հետևիր «Օնլայն Ռադիոյի» եթերին քո բջջայինից
