ՖՐՈԴ ԲԵՐԳ. «Լուծումը բանակցելն է»

Հայոց ցեղասպանության 100-րդ տարելիցի առիթով Հայաստան այցելած տարբեր ազգության հանրահռչակ անձանցից և պետական գործիչներից բացի այցելել են նաև պարզապես սովորական մարդիկ, ովքեր կիսում են մեր ցավը: Առիթ ունեցանք զրուցելու նրանցից մեկի՝ ազգությամբ նորվեգացի, զինվորական Ֆրոդ Բերգի հետ, ով արդեն 6 տարի է ապրիլի 24-ին այցելում է Հայաստան:
— Ինչպե՞ս առաջացավ հետաքրքրությունը հայերի, Հայաստանի և Հայոց ցեղասպանության հանդեպ:
— Դրդապատճառը մասնագիտական էր: Վերջին 24 տարին՝ մինչ թոշակի անցնելս, սահմանապահ եմ եղել ռուս-նորվեգական սահմանին: Հայաստան եկա սեփական աչքերով տեսնելու հայ-թուրքական խնդրահարույց սահմանը: Ես «կոնֆլիկտային սահմանների» մեծ սիրահար եմ (խմբ. — ծիծաղում է):
Երբ առաջին անգամ եկա՝ Հայաստանի մասին գրեթե ոչինչ չգիտեի: Հայոց ցեղասպանությունն ինձ շատ հուզեց, հատկապես երբ տեղեկացա, թե հայրենակիցս` հռչակավոր ճանապարհորդ Ֆրիտյոֆ Նանսենը, որքան մեծ նվիրումով է մոտեցել հայ ազգին ցեղասպանությանը հաջորդող տարիներին: Ձեռք բերեցի անգլերեն գրքեր հայոց պատմության մասին և որոշ չափով օգտվեցի նաև համացանցից: Այդպես ավելացրեցի գիտելիքներս Հայաստանի վերաբերյալ:
— Ինչպե՞ս եք վերաբերում այն փաստին, որ Նորվեգիան դեռ չի ընդունել Հայոց ցեղասպանությունը:
— Կարծում եմ՝ դեռ շատ վաղուց պետք է ընդունած լիներ: Թուրքիայի և Ադրբեջանի հետ ունեցած տնտեսական կապերն ու ՆԱՏՕ-ի անդամ լինելն են, որ թույլ չեն տալիս դա անել:
— Որքանո՞վ են նորվեգացիները տեղեկացված Հայոց ցեղասպանության մասին:
— Այս օրերին Նորվեգիայի ԶԼՄ-ները մշտապես անդրադառնում են այս հարցին: Սա մասնակիորեն է ապահովում տեղեկատվությունը: Նորվեգիայում կան երկուսից երեք հազար հայեր և իրենք էլ հեռուստատեսությամբ պատմում են Հայոց ցեղասպանության մասին: Առհասարակ, նրանք բոլորն էլ ինտեգրված են Նորվեգիայի հասարակության մեջ, շատ խելացի ու աշխատասեր մարդիկ են, լավ են տիրապետում նորմանդերենին: Նորվեգիայում մենք կազմակերպել ենք Հայոց Ցեղասպանության մասին պատմող մի շարք շնորհանդեսներ: Հետագայում էլ պատրաստվում եմ իրականացնել բազմաթիվ ծրագրեր` հիմնվելով Ֆրիտյոֆ Նանսենի աշխատությունների վրա:
— Որպես սահմանապահ, ինչպե՞ս կգնահատեք հայ-ադրբեջանական սահմանային խնդիրների լուծման հնարավորությունը:
— Կարծում եմ՝ այս հարցի միակ լուծումը մեկ սեղանի շուրջ բանակցելն է: Նորվեգիայում մի համաժողովի ժամանակ ինքս կազմակերպել եմ հանդիպում մեկ սեղանի շուրջ հայերի և ադրբեջանցու միջև: Հետևաբար՝ դա հնարավոր է ազդեցիկ միջնորդի առկայության դեպքում: Այդ միջնորդը կարող է Ռուսաստանը լինել:
— Ինչ եք կարծում` ե՞րբ վերջապես Թուրքիան կընդունի Հայոց ցեղասպանությունը:
— Ես լավատես եմ՝ կանխատեսում եմ 3-5 տարի: Ադրբեջանի համեմատ՝ Թուրքիայի հետ հարցերն ավելի հեշտ կպարզաբանվեն:
— Պարոն Բերգ, հայ-թուրքական սահմանը տեսնելուց հետո ցանկություն չե՞ք ունեցել տեսնելու հայ- ադրբեջանականը:
— Իհարկե: 2014թ.-ի ամռանն այցելեցի Ղարաբաղ: Տեսա ղարաբաղյան հողերը և շատ տպավորվեցի: Հիացա հատկապես Տիգրանակերտով:
— Իսկ Երևանում ո՞րն է ձեր ամենասիրելի վայրը:
— Այստեղ ամենից շատ սիրում և մշտապես այցելում եմ Ծիծեռնակաբերդի հուշահամալիր: Երեկոները սիրում եմ քայլել Հանրապետության հրապարակով և զմայլվել Երգող շատրվաններով: Հայաստանում շատ եմ տպավորված Խոր Վիրապով:
— Շնորհակալությու՜ն հարցազրույցի և Ձեր գործունեության համար, պարոն Բերգ: Վստահ եմ էլի կայցելեք Հայաստան:
ԷԼԵՆ ՀԱԿՈԲՅԱՆ

Հեղինակը՝ «Օնլայն Ռադիո (Հայաստան)»

Տես նաև

www.onlineradio.am onlineradio.am onlineradio online radio

«Հայաստանի քաղաքացու երգը» Նիկոլ Փաշինյան

«Հայաստանի քաղաքացու երգը» Նիկոլ Փաշինյան

www.onlineradio.am onlineradio.am onlineradio online radio

Նիկոլ Փաշինյանի ասուլիսը՝ Սերժ Սարգսյանի 3-րդ պաշտոնավարման դեմ

Նիկոլ Փաշինյանի ասուլիսը՝ Սերժ Սարգսյանի 3-րդ պաշտոնավարման դեմ

Թողնել պատասխան