«Երիտասարդ գրողներ» — Զաբելա Մուրադյան

www.onlineradio.am onlineradio.am onlineradio online radio eritasard groghner zabella muradyanԳրականությունն օգնում է ինքնաբացահայտվել և ճանաչել իրական արժեքները:
Ժամանակակից գրականության զարկերակը շարունակում է բնականոն աշխատել, իսկ մենք փորձում ենք ուշադրության կենտրոնում պահել մեր երիտասարդ, տաղանդավոր ստեղծագործողներին, որոնցից շատերը կդառնան մերօրյա գրականության կարևորագույն դեմքերը:
«Հմուտ գրվածքը նման է անվաչմուշկի. այն ձեզ տանում է այնտեղ, ուր դուք ամենևին չէիք կամենում»,- այսպիսի հրաշալի տողերով է բնորոշում Էմերսոնը ստեղծագործության անկանխատեսելիությունը: Այո՛, երբեմն գրիչը գրողի մտքից առաջ է անցնում, գծում իր ուղին և հարթում իր ընթացքը: Տեսնենք, թե ստեղծագործական ինչպիսի՞ ճանապարհ է անցել մեր այսօրվա հերոսը, ինչպիսի՞ դժվարություններ է հաղթահարել, և ինչպե՞ս է պատկերացնում ժամանակակից գրողի կերպարը: Մեր հյուրը սիրում է թևածել հոգու գաղտնարաններում, շոշափել անցյալը, լավատեսորեն տրամադրվել դեպի ապագան, սակայն դատողությունները կատարում է ներկայի սահմանից: Նրա ստեղծագործությունները շողում են վարակիչ անկեղծությամբ, պարզ են աչքի պես և բարդ են աչքի պես, իսկ ամբողջ տաղանդը հենց պարզության մեջ է:
Մեր հյուրն է Զաբելա Մուրադյանը:
Բարև, Զաբելա: Շնորհակալություն մեր հրավերն ընդունելու համար: Որտեղի՞ց ես ծնունդով, ի՞նչ մասնագիտություն ունես:
Ծնվել եմ Կոտայքի մարզի Հրազդան քաղաքում, այժմ ապրում եմ Էջմիածնում: Ավարտել եմ Ակսել Բակունցի անվան մանկավարժական քոլեջի «Տարրական դասարանների դասավանդում» բաժինը: Այժմ սովորում եմ հաղորդավարության և լրագրության մասնավոր ստուդիայում:
Ո՞րն է քո ստեղծագործության առանցքը, ի՞նչը կարող է քեզ համար դառնալ ներշնչանքի աղբյուր:
Դա մի քիչ անկանխատեսելի է. ներշնչանքի աղբյուր կարող է դառնալ այն ամենը, ինչը կարող է գրավել ինձ:
Կա՞ն այնպիսի թեմաներ, որոնց երբեք չես անդրադառնա: Ո՞րն է քո գրչի նպատակը:
Երևի չկա մի թեմա, որին չեմ անդրադառնա: Տարիքի ընթացքում թեմաներն էլ են փոխվում: Հիմա սիրո թեման այդքան էլ չեմ արծարծում:
Հետաքրքիր է, երիտասարդ ես և չես սիրում գրել սիրո մասին: Մինչդեռ երիտասարդները հենց այս թեման են նախընտրում, դա ինչո՞վ է պայմանավորված:
Բոլորը գրում են սիրո թեմայով. մի տեսակ ցանկություն է առաջանում տարբերվել, առանձնանալ: Ավելի շատ գրում եմ վերացական երևակայական թեմաներով:
Ո՞վ է քո ստեղծագործությունների առաջին ընթերցողը, և, առհասարակ, ի՞նչ դեր ունի ընթերցողը գրողի կյանքում:
Ընթերցողն, իհարկե, մեծ դեր ունի գրողի կյանքում: Իմ առաջին ընթերցողները «Երիտասարդ գրողներ գրական ակումբի» անամներն են:
Ստեղծագործում ես չափածո և մտքերդ արտահայտում կարճ, սեղմ և համառոտ: Ի՞նչպես կատարվեց այդ ընտրությունը, երբևէ չե՞ս մտածել արձակ ստեղծագործելու մասին:
Արձակ ոճում ևս ստեղծագործում եմ: Ընտրությունը՝ որպես այդպիսին, չեմ կարող ասել. գրեցի և ստացվեց այդպես:
Ո՞վ է քո սիրելի գրողը:
Վահան Տերյանն է:
Ինչո՞ւ հենց Տերյան. նրա մատուցած պոեզիան է քեզ հոգեհարազատ, թե՞ նրա անցած ճամփան է ուսանելի:
Տերյանի ոճն է հոգեհարազատ՝ սիրում եմ նրա թախիծը:
Տերյանը նշում էր, որ իր թախիծը լուսավոր է: Քեզ մոտ է՞լ է այդպես:
Շատ հակադիր ստեղծագործություններ ունեմ: Կան ստեղծագործություններ, որ միանգամից բարին է նկատվում, կան, որ սևի մեջ են:
Վահան Տերյանը մեր գրականության լավագույն սիրերգակներից է: Ինչո՞վ է պայմանավորված՝ սիրերգակով ոգեշնչվել, բայց չգրել սիրո մասին:
Գուցե գա ժամանակ, որ սկսեմ գրեմ սիրո մասին: Կարծում եմ, որ այդ ժամանակը շատ մոտ է:
Գուցե դու ինքդ էլ սիրահարվա՞ծ ես:
Սիրահարվելու ընթացքն անցել է:
Սիրո ո՞ր փուլն է առավել նպաստավոր մուսայի համար:
Սիրահարվածությունից հետո:
Ըստ քեզ՝ ի՞նչ է մուսան:
Մուսան մի երևույթ է, որ բնակվում է քո մեջ. յուրաքանչյուր պահի կարող է ցույց տալ իր տեղը:
Ձեր խոսքը մեր ռադիոունկդրին և գրչակից ընկերներին: Ի՞նչ խորհուրդ կտաս այն երիտասարդ գրողներին, որոնք վախենում են իրենց ստեղծագործությունները տեղադրել ֆեյսբուքյան տարբեր գրական խմբերում:
Կարծում եմ, վախենալ պետք չէ: Պետք է ռիսկի դիմել: Գնահատում եմ ոչ միայն դրական, այլ նաև բացասական կարծիքը: Շատ կարևոր է քննադատությունը. այն կարող է շատ բան փոխել գրողի մեջ:
Շնորհակալ ենք ձեզ անկեղծ և գեղեցիկ զրույցի համար: Մաղթում ենք նորանոր հաջողություններ և բեղուն գրիչ:

«Ոճը գաղափարների ծնունդ է, ոչ թե բառերի»,-այսպես է գրում Բալզակը: «Բառերի հետ խաղալը վտանգավոր է, բայց և հաճելի: Յուրաքանչյուր բառ պետք է դնել իրեն հասանելի տեղում, այլապես այն կնմանվի անտոմս ուղևորի, որին ցանկացած ընթերցող կարող է ճանաչել և դուրս հանել»:

Հաղորդավար՝ ՍՈՆԵՏ (Սոնա Վանյան)

Ես փոխում եմ առավոտը.
Նրա լույսին կաթացնելով գիշերվա մութ,
Այն դարձնում եմ հեքիաթային՝ գիշերվա պես,
Երազային մթում առկա լռության պես,
Եվ սքանչելի ու գունագեղ:
Ես փոխում եմ մայրամուտը
Նրա բոց ու կարմիր գույնին,
Նաև խառնում երկնագույնը:
Ես փոխում եմ շողն արևի.
Եվ ուզում եմ վառ դեղինին
Մոխրագույնը փոխարինի:

Աշնան հանդես

Լռության մեջ սավառնում է հոգին իմ լռակյաց,
Եվ տանում է իր հետ աշնան տերևները թաց,
Գալարվում է ասես ծառը աշնան բեռից
Եվ արևն է կարմրում նրա հմայքից:
Սիրառատ աշունը մի երգ է շշնջում,
Երկնի ու երկնքի ջերմ ու տաքուկ գրկում:
Փոթորկահույզ քամին խառնվում է հողին,
Եվ համբույր է տալիս ոսկե տերևներին,
Աշնան այս հանդեսում իմ հոգին եմ փնտրում,
Որը թաքնվել է ծառի փոքրիկ սրտում:

Զաբելա Մուրադյան

Յուրաքանչյուր կիրակի ժ. 18:00-ին (կրկնությունները. կիրակի ժ. 23:00-ին և երկուշաբթի ժ. 13:00-ին)
www.onlineradio.am-ի եթերում «Երիտասարդ գրողներ» հաղորդաշարն է՝ Սոնետի հետ:
—————————————————
Ֆեյսբուքյան էջին կարող ես հետևել՝ անցնելով այս հղումով
—————————————————
Հետևիր «Օնլայն Ռադիոյի» եթերին քո բջջայինից

Հեղինակը՝ Սոնա Վանյան

Տես նաև

www.onlineradio.am onlineradio.am onlineradio online radio

«Հայաստանի քաղաքացու երգը» Նիկոլ Փաշինյան

«Հայաստանի քաղաքացու երգը» Նիկոլ Փաշինյան

www.onlineradio.am onlineradio.am onlineradio online radio

Նիկոլ Փաշինյանի ասուլիսը՝ Սերժ Սարգսյանի 3-րդ պաշտոնավարման դեմ

Նիկոլ Փաշինյանի ասուլիսը՝ Սերժ Սարգսյանի 3-րդ պաշտոնավարման դեմ

Թողնել պատասխան